*شھید غلام محمد بلوچ*

*شھید غلام محمد بلوچ*

ما وتی کشءُ کراں چمشانک بدیں تہ انچیں مردم ما گندیں کہ آ زندگ َانت بلّے وتی میتگءَ ڈن کس آیاں پجاہ نیاریت، ءُ  ھمے میتگءَ اوں کسےءِ دردےءَ نہ ور َانت تو گشت کن ئے زندگیناں شمار نہ بنت۔

 لھتے انچیں مردم اے جہانءَ ودی بیت کہ وتی میتگءَ ھوار کلیں راجءُ سرڈگارءِ گمءُ دردءَ وتی ماریتءُ آئی زندءُ مرگ پہ راجءُ وتنءِ دیمرویءُ پہ آسراتیءَ ندر بیت چشیں مردمءَ مرگ ُکشت نہ کنت داں ابد آ وتی کرد ءِ دروشمءَ دنیاءَ زندگ مان ایت۔

بلوچ راجدپترءَ انچیں لھتے بلوچ گوستگ کہ آ سرجمیں بلوچےءِ بستارءَ زانگ بنت پرچہ کہ آیانی زندمان داں مرگ بلوچءِ ھاترا کربان بیتگ۔ چرا راجی سراں یکے شھید غلام محمد بلوچ انت.

غلام محمد 1 جنوری 1959ءَ واجہ ایوبءِ لوگءَ مندءَ ودی بوت۔
بنگیجی وانگ چہ گورنمنٹ ھائی اسکول سوروءَ بندات ئےِ کت۔
1980ءَ میںڑک چہ ہائی اسکول سورو مندءَ دری برت۔
گریجویشن چہ 1985 ءَ سندھ مسلم کالج کراچیءَ ۔

سیاسی سپر  چہ بی ایس او ءِ فلیٹ فارم ءَ بندات ئےِ کت ۔
 اے نیامءَ بی ایس او مند زونءِ ممبریءَ بگر داں 1982 ءَ کراچیءِ زونل جنرل سیکرٹری ءُ 1984 ءَ بی ایس او سندھءِ صوبائی صدرءُ داں 1990 ءَ بی ایس او ءِ چیئرمینیءَ داں غلام محمدءِ راجی جھد ہر تکءَچو درپشوکیں سھیلءَ درپش اتءُ ساڑاھگ بیت۔
1986ءَ شھید جی ایم ءَ اولی آروس کرت، اولی سانگءَ  سے چک ئےِ بوت،  دو بچک ایوبءُ بالاچءُ یک جنکے مھرجان انت ۔
اولی جنینءِ وپاتیءَ پد دومی آروس گوں بی بی سلمہءَ 15 اگست 2000 ءَ بیت،
 چہ دومی سانگءَ دو چک   بہاولءُ ماھجان  ودی بیت َانت۔

2 مئی 2004 ءَ ھستیں بی این ایمءِ چیئرمین  گچین کنگ بیت۔

 غلام محمدءِ زندءُ مرگ پہ بلوچ ءُ بلوچستان ءَ مدام یات کنگ بیت۔بلوچستان ءَ ھوار مندءِ ھاسکن مردم واجہءِ کمیءَ مدام مار َانت آ سوروءِ چوک بہ بیت یا مندیگءِ کئور کہ شھید واجہءِ لھتے انچیں یات اے جاہ آں ُکبل َانت کہ مدام گیر آرگ بنت۔ مندیگءِ کئورءِ چیک پوسٹءَ وھدے ایف سیءِ واکداراں چہ گاڑیءَ زالبول ایر گپت انت پہ گاڑیءِ پٹگءَ زالبول کمشرپ کت َانت گڑا 2 مئی 2005 ءَ شھید غلام محمدءِ سروکیءَ مندءِ مردماں چیک پوسٹ ءِ پاد کنگءَ پہ سورو چوک داں مندیگءِ کئورءَ روانکے کش ات ءُ نندانک دات۔
ایف سیءِ مردمانی ترسینگءُ تاچینگءَ مزنیں ہیلہءُ ھنرے کت، بلے غلام محمد گوں سنگتءُ مندءِ مردماں چو شیرازءِ کوہءَ مک ات کہ مارا ُبہ ُکش یا چست کن وتی چیک پوسٹءَ۔
 لٹ شاپ ءُ تیرگواریءَ لھتے مردم ٹپی بیت بلے غلام محمد پہ تمردیءَ اوشتوک ات۔
گڈسرا ایف سی لاچار بیت ءُ آئی میجرے چہ سورو کیمپءَ اتک ءُ غلام مھمدءِ گشت بیا سوار بی گاڑیءَ رواں کیمپءَ اے بابتءَ گپ جناں، غلام مھمدءَ دراہینت ترا ھر گپے کنگی انت ھمے زگریں روچءِ سرا بلوچ راجءِ دیما بہ کن ئے کہ درست سرپد بہ بنت ۔میجر غلام مھمدءِ سروکیءَ بلوچ راجءِ زورءِ دیما بیوس بیتءُ وتی چیک پوسٹ چست ئےِ کت۔ءُ مھلوقءَ سارتیں گینے کش ات۔
یک دلیرءُ ایمانداریں راھشونےءِ اے یک گونڈیں جلکشے ات۔

غلام مھمدءِ زند چہ راجءَ بندات بیتءُ پہ راجءَ وتی ساہءُ سری بکشاتنت، مردم پہ پھرے اے ھبرءَ گشت کنت کہ غلام محمد یک سرجمیں بلوچے ات۔

غلام محمدءِ سیاسی سرگرمیانی سببءَ پاکستان ءُ آئی چانیگوار سک تکانسراتنت، بلوچستان ءِ لٹءُ پلءِ دیما غلام محمد یک مزنیں اڑاندے ات، بلوچستان ءِ کنڈ کنڈءَ غلام محمدءِ جھد برجاہ ات، جلسہءَ ات، روانک کشئگءَ ات، دھرنا دیئگءَ ات، پریس کانفرنس ءَ ات، انٹرویو دیئگءَ ات، کارنر میٹنگ ءَات، ھر ھما کار کہ زہن سازی عملءِ بھرات غلام محمد ھما کارءَ ھمگرنچ ات ۔
تہ لگوریں دشمنءَ بلوچءِ کوہیں کلات گوں دو سنگت(لالہ منیر ءُ شیر محمد)ءِ ھواریءَ  3 اپریل 2009 ءَ چہ کیچءَ آوار جت َانت ءُ 9 اپریل 2009 ءَ سئے ایں ھستیانی لاش مرگاپءَ دوْرئےِ داتنت۔

مئے تبءِ سرکئیلیءِ انگت نہ پرشتگ مھکمی
ھمبلاں مکرانی بلے اکل تاچینتگ وتی

غلام محمدءِ شھادت پہ راجءُ جنزءَ مزنیں تاوانے بیت۔

شھیدءِ کمی مدام مارگ بیت، ھاس ھستیں وھدءِ جاوراں کہ چاریں آتراپاں کہ زبھریءِ تھاری انچو مانشانان انت کہ دورءَ رژنےءِ جلکشے ودی نہ بیت۔

  شنگکار:         (بلوچ چاگردی کمیٹی مند)